غزل
مجاہد اقبال مجاہد
کیہ پیا سوچنا ایں گل اُتے غور کر
اج پیا جچنا ایں کل اُتے غور کر
جد تیرے بت وچوں روح کڈھی جانی ایں
اوکھے اوس زندگی دے پل اُتے غور کر
اوکڑاں نوں ویکھ کے تے ہنجو ایویں کیرناں
مسئلیاں نوں چھڈ پراں حل اُتے غور کر
ہسدی بہار کِتے، کِتے خوشحالیاں
زندگی ویران کِتے تھل اُتے غور کر
جو کجھ بیجنا ایں اوہو کجھ وڈھنا ایں
بیں تے دھیان دے پھُل اُتے غور کر
اک اک شے وچ لکھاں نیں نشانیاں
زندگی دے اک اک پل اُتے غور کر
ذرا جیہا ویکھ کے ہس کے تے لنگھ ناں
چنگی طرحاں ویکھ پہلاں، ول اُتے غور کر
سکھی نہ گمان کر ہاسے ویکھ مکھ تے
اٹھدی اے سینے جہڑی چھل اُتے غور کر
میری نہیں جے مندا نہ من توں مجاہدا
سینے جو کھڑکدا اے ٹل اُتے غور کر
