غزل
جاوید عارف
دل نوں کھیڈ کھڈا لے تے پھر سوں لئیں یار
اجڑی جھوک وسا لے تے پھر سوں لئیں یار
اپنے دل دے موسم دی رکھوالی لئی
اندر جھاتی پا لے تے پھر سوں لئیں یار
کھنجیا ویلا ہتھ نہیں آئوندا میں آکھاں
نچ کے یار منا لے تے پھر سوں لئیں یار
اج کل سجنا چور لٹیرے حاکم نیں
اندروں کنڈی لا لے تے پھر سوں لئیں یار
چنگے دن آ جاسن’ چنگیاں خواباں نوں
اکھاں وچ سجا لے تے پھر سوں لئیں یار
لمیاں کالیاں راتاں گھپ ہنیرے نیں
سانوں کول بٹھا لے تے پھر سوں لئیں یار
پیار پریت دے زخم تے تیرے گہنے نیں
ایہناں نوں چمکا لے تے پھر سوں لئیں یار
تیریاں وکھریاں گلاں پیار چ روکاں نیں
ایہہ دیوار ہٹا لے تے پھر سوں لئیں یار
عارف کد اوہ روز خبر نوں آئوندا اے
دل دے وچ بٹھا لے تے پھر سوں لئیں یار
