دیر نہیں کرنی

ایم وائی شاہد

کسے نوں تیری لوڑ ہووے
کسے ول جاونا ہووے
کسے دی اک واج دے اتے
جے ہووے اڈاری بھرنی
کدی وی دیر نہیں کرنی
کسے دے دکھ ونڈاونے ہوون
کسے دے چا ودھاونے ہوون
کسے دے ہنجو پونجھنے ہوون
توں اپنی ہمت نہیں ہرنی
کدی وی دیر نہیں کرنی
کِتے جھانجھر چھنکدی ہووے
کِتے چوڑا کھنکدا ہووے
جے پیار دیاں ریتاں سانبھیے
فیر کوئی سدھر نہیں مرنی
کدی وی دیر نہیں کرنی
کِتے دریاواں دے کنڈھیاں تے
کِتے مٹی دے تھڑیاں تے
ڈھاکاں تے چکے گھڑیاں دے
کِتے ہرنی وی ہے چرنی
کدی وی دیر نہیں کرنی
کسے دی اکھ دی لالی لئی
کسے دے مکھ سوالی لئی
پھل کلیاں دی ڈالی لئی
سکھاں دی جھولی بھرنی
کدی وی دیرنہیں کرنی