ہلاری

اقتدار جاوید

ایہہ موت بلارا جنیاں دا
ایہہ پینگھ ہلاری سُفنے دی
ایہہ گڑھ ہے بھٹیاں سچیاں دا
ایہہ بھاجی وڈیاں کھرلاں دا
ہک لال تروپا سینے وچ
ایہہ نئیں ششکارا کتیاں دا
ایہہ گل نئیں بلیاں کتیاں دی
ایہہ اکھیوں پھُٹدے لانبو نیں
ایہہ قصہ وڈی مستی دا
ایہہ پاہرہ شینہاں ستیاں دا
نہ دھپاں دھاکے اوندیاں دا
نہ نگھاں گوہڑیاں چھاواں دی
ہک تارہ سر تے ڈول پوے
ہک وأ ان وگدی چیک پوے
فیر سُماں دے دھرساناں وچ
اگاں دیاں چننگاں اڈدیاں نیں
نہ سورج چڑھدیوں چڑھدا ہے
نہ شاماں لہندے ڈبدیاں نیں
ہک موت ککارہ ازلاں دا
ہک جیون جوتی اکھیاں دی
یاں لال کنارے اگے نیں
یاں پچھے کوئی ہگیر ہے مویاں مکھیاں دی
ایہہ پانسہ جس دے لیکھاں دا
ایہہ ترے کانیاں دی کھیڈ ای نئیں
ایہہ نکی موٹی بارش نئیں
ایہہ مینہ پھانڈے دے کنیاں دا
ایہہ ایس زمین دی بوہنی ہے
ایہہ روپ نئیں ہک دوجے دے
اتے ست اسماناں تنیاں دا
ایہہ موت ہلارہ جنیاں دا