غزل
الیشع ایاز
میں اک اولھے ہار پرویا کیہ ہویا
سُفنا اکھیاں وچ لکویا کیہ ہویا
ہن اوہ عمر پرائی ہو گئی کیہ ہویا
ہن اوہ ویلا اوبھڑ ہویا کیہ ہویا
لج تے رہ گئی ڈب کھڑبیاں چھاواں دی
سورج اگے مڑھکا چویا کیہ ہویا
میں رَتاں نال دیوے بالاں فجراں تائیں
توں لوواں لئی جسا گویا کیہ ہویا
اتھری واء نے ہور وی کئی چن چڑھائے
رُکھاں مونہوں ہاسا کھوہیا کیہ ہویا
سدھر سدھر اتھر کیرے ڈھاواں مارے
بالاں جیڈا چاء وی رویا کیہ ہویا
مان ودھایا مر کے اپنی رہتل دا
غیرت پچھے جے کوئی مویا کیہ ہویا
