غزل
رمضان شاکر
ڈانواں ڈول حیاتی نوں اک پیار سہارا ملیا اے
جاپے جیویں قسمت دا انمول ستارا ملیا اے
لبھا لعل گواچا تے ہن سدھراں راحت پائی اے
فیر اج روندیاں اکھیاں نوں اوہ سجن پیارا ملیا اے
من موہنی جہی صورت تیری رب دی صورت لگدی اے
تینوں پلکاں ہیٹھ چھپا کے بڑا نظارا ملیا اے
تقدیراں دے ویہنیں جنھوں چھلاں توڑ گرایا سی
ڈولے کھاندی بیڑی نوں اج فیر کنارا ملیا اے
جی کردا اے اوہدے بوہے باقی عمر گزار دیاں
دل دیاں ٹٹیاں آساں نوں اک آس دوارا ملیا اے
گیتاں’ غزلاں’ نظماں نے وی نویں حیاتی پائی اے
اوہدی اکھ دے ولوں شاکر عجیب اشارا ملیا اے
