اسی تاریخ لکھنے آں……………………
اسی دھوناں توں پھڑنے آں ایہناں ظل الہیاں نوں
اسی ظلماں توں ڈکنے آں ایہناں ظالم قصائیاں نوں
اسی تاریخ لکھنے آں……………………
اساڈی تان تے لے تے زمانے رقص کردے نیں
اساڈے حرف تے اکھر پوتر شبد بن دے نیں
اسی تاریخ لکھنے آں……………………
اس ٹھوکر تے رکھنے آں ایہناں تاجاں دے بھکیاں نوں
اسی دھتکار چھڑنے آں ایہناں دنیا دے کتیاں نوں
اسی تاریخ لکھنے آں……………………
اساڈی مشک پاٹے تے ہزاراں علم بن جاون
اساڈے ہتھ کٹیون نے ہزاراں قلم بن جاون
اسی تاریخ لکھنے آں……………………
اساڈے سیس نئیں نیندے کسے جگجیت دے اگے
اسی سجدے وی نہیں کردے کے رنجیت دے اگے
اسی تاریخ لکھنے آں……………………
اساڈے صبر دی ہیبت توں آمر تھرتھراندے نیں
اساڈی قبر دی ہیبت توں آمر تھر تھراندے نیں
اسی تاریخ لکھنے آں……………………
اسی فاتح اسی غالب اسی صف چیر ہونے آں
اسی تلوار دو دھاری اسی رندھیر ہونے آں
اسی تاریخ لکھنے آں……………………
اساڈی موت دے بعدوں کدی وی رون نئیں رکدے
خدائی وین کر دی اے کدی وی نین نئیں سکدے
اسی تاریخ لکھنے آں……………………
