غزل
بابا نجمی
میں وی تیری شان تے لکھاں کر میری امداد
سو سو گز دے تھان تے لکھاں کر میری امداد
غاراں دے وچ ہنجو ڈولھے جہناں میرے لئی
اوہناں دے احسان تے لکھاں کر میری امداد
اپنے مونہہ دیاں ہڈیاں بھنیاں تیرے عشق چ جس
تیرے اوس جوان تے لکھاں کر میری امداد
جہڑی اکھ وی جتھے کھلے ویکھے تیرا ناں
اینا ایس جہان تے لکھاں کر میری امداد
میرے ذکراں نال کیہ ہونی اچی تیری شان
میں دل دے ارمان تے لکھاں کر میری امداد
جہناں نال اجاگر ہوواں اوہ اکھر توں گھل
میں اپنی پہچان تے لکھاں کر میری امداد
تینوں چت نہ چیتے بھاویں پر ایہہ میرا فرض
تیرے کیتے دان تے لکھاں کر میری امداد
