غزل
جان کاشمیری
لوکی گھر گھر پُچھدے پِھردے میلی پگ دے اندر کون
میں وی چنگا توں وی چنگا مندا جگ دے اندر کون
سیک نے تانے چاروں پاسے اَسماناں تیکر تمبو
اَگ دے اندر جھاتی پاؤ رہندا اَگ دے اندر کون
بندے دی اوقات کی دسّاں، بندے دی اوقات اے ٹھاہ
ویلے کویلے ٹھگیاں لا کے، گُڑکے ٹھگ دے اندر کون
ظرف دے نالوں بُہتی ودھ مظروف دی عزّت ہندی اے
جگ مگ جگ مگ کردا جاوے جڑیا نگ دے اندر کون
آہری لوکی آہری ہُندے بھاویں نظریں پیندے نئیں
دنیا چائے دا خالی مگ اے، وَسدا مگ دے اندر کون
خاکی ذرّے کِکلی پاؤن پھڑ کے رِشماں مہر دیاں
چھت دے اُتے مگ اے بے شک چمکے مگ دے اندر کون
پاگل جگ نوں دھوکا دیون کر کے وظیفہ ”لگ بھگ” دا
لگ دے اندر کون نمانا، چُھپیا بھگ دے اندر کون
چھیتی چھیتی پُچھ کے دسّو کسے سیانے کولوں جان
مگ دے اندر مگ اے وڑیا، وڑیا مگ دے اندر کون
