جیوے ہر کسان
سلیم نجمی
صدقے واری میں قربان
دیس دا جیوے ہر کسان
ظالم اگے اڑنا پے گا
اپنے حق لئی لڑنا پے گا
بن کے گبھرو شیر جوان
دیس دا جیوے ہر کسان
ہر کوئی کردا دھکا ایتھے
جو وی چور اُچکا ایتھے
سبھ دے اگے سینا تان
دیس دا جیوے ہر کسان
دونے تینے ٹیکس لا کے
کھاد تے تیل دے مُل ودھا کے
حاکم تینوں لُٹ لُٹ کھان
دیس دا جیوے ہر کسان
بھار ایہہ بھارا چکنا پے گا
ہتھ سرکار دا ڈکنا پے گا
تلی تے دھر کے ویرا جان
دیس دا جیوے ہر کسان
نجمی دکھ ونڈاون والا
سب دی بھُکھ مٹاون والا
ہل پنجالی جس دی شان
دیس دا جیوے ہر کسان
