غزل
جاوید عارف
آپ تے سر نوں نیواں کر کے لنگھی جاندے
سانوں چک کے سچ دی سولی ٹنگی جاندے
جمدیاں کوئی بھیڑا ہندا جھوٹھی گل اے
بھیڑے لوکی اپنے رنگ وچ رنگی جاندے
وڈے ڈھڈاں والے اکا شکر نہیں کردے
ویکھو بک بنا کے ہور وی منگی جاندے
ڈردے ماریاں ددھ پیالے بھر بھر رکھے
پھیر وی موقع ملدیاں سانوں ڈنگی جاندے
پچھلے پیریں لتر کھا کے بھج دے ویکھے
ڈاڈھے دے گھر جہڑے وانگ ملنگی جاندے
ساڈے وصل دیہاڑے کنے تاپ چ بھج گئے
باقی بوہے اگوں لنگھ دے کھنگی جاندے
وکھریاں راہواں چھڈ دے عارف جے کر جینا
اودھر ٹر پئے جدھر سارے سنگی جاندے
