تیرا حُسن
شاہدحسین
تیرے مُکھ توں کھِر کھِر رِشماں
چن نوں وی شرماندیاں نیں
اکھیاں ٹِم ٹِم تارے بلدے
زُلفاں دِل پرچانیاں نیں
جد دیاں ویکھیاں اکھاں تیریاں
بُھلیاں سانوں راہواں نیں
تیری یاد دے موسم اندر
مہکیاں ساڈیاں ساہنواں نیں
تیرے ہاسے چوری کر کے
کلیاں کھِل کھِل جاندیاں نیں
گلّاں پھَل قندھاری اُگدے
بُلیاں پُھل دیاں پتیاں دو
حُسن تیرے دے درشن لئی سب
چن تے تارے جان کھلو
تیریاں باتاں کر کر راتاں
سکھیاں دِن چڑھاندیاں نیں
