پنجاب دیاں مورتا
ارشاد سندھو
کتھے گئیاں رانیاں
نہیاں تے مدھانیاں
بھٹھ تے تندوریاں
بوڑویں تے چوریاں
بوریاں تے کالیاں
ہل تے پنجالیاں
ترینگلاں دوسانگیاں
پھوڑیاں تے واہنگھیاں
تیریاں تے ساڈیاں
داتری تے واڈھیاں
ویلنے تے چکیاں
مرزے تے بکیاں
دوہنیاں تے باٹیاں
مگھڑے تے چاٹیاں
دوریاں تے کونڈیاں
کِھدڑے تے کھونڈیاں
پھل پتی پِڑیاں
آٹے دیاں چِڑیاں
قلماں سلیٹیاں
نِنگلاں تے ٹیٹیاں
گاچیاں تے پھٹیاں
ٹوپڑے تے چھٹیاں
پکھے تے بھنبھیریاں
پِنی تے پنجیریاں
ٹوکرے تے کھاریاں
آلے، کھڈے، باریاں
پنڈ، تھبی، پولیاں
اکھلی تے موہلیاں
تنگڑاں تے دابڑے
چھج،چِھکو،چھابڑے
وِرہوں تے سخاوتاں
نِگھ تے ترواتاں
اٹیرنے تے اوریاں
پلیاں تے گھوریاں
لیف تے نہالیاں
چھنے تے پیالیاں
کھیسڑے تے جلیاں
کِھڑکے تے چُلھیاں
لاٹو تے لٹونیاں
چرخے تے پونیاں
تاوڑی کنالیاں
کڑچھی کٹھالیاں
کولیاں تے دھامیاں
لاگ تے سلامیاں
گھڑے گھڑونجھیاں
کھجی دیاں منجیاں
کندھاں مڈھیں کیڑیاں
چونکیاں تے پیڑھیاں
جھالراں تے تنیاں
چونترے تے انیاں
کِنگرے کندھولیاں
ڈھانگڑے تے ہولیاں
رنبیاں کھدولنے
رکھڑی تے ڈھولنے
چھتیریاں تے کڑیاں
ڈکرے تے وڑیاں
ٹِنڈڑاں تے پاڑچھے
کڑاہی، گنڈ ،کاڑچھے
گلیتری تے موکیاں
پتوہیاں تے سلوکیاں
اُلاہنگھڑاں تے چُنگیاں
لاچڑے تے لُنگیاں
جنگلے تے چننے
سباتاں تے چھمننے
مگری ، وگینیاں
ڈھاریاں تے بھینیاں
دھیلیاں چوانیاں
نتیاں تے گانیاں
گھنگھرو تے ٹلیاں
پیٹھیاں تے پلھیاں
سِنی دیاں رسیاں
مکھنی تے لسیاں
بھوجنے گھروڑیاں
گڑ دیاں روڑیاں
آبھو، ستو، ہولڑاں
لسوڑھیاں تے گھولڑاں
مسکے تے گھوریاں
اِنّوں تے چٹوریاں
حالے وی ستاندیاں
گانے تے پراندیاں
سُرمے تے دھاریاں
گوٹے تے کناریاں
پیلکاں بھپولھڑے
رومالیاں پٹولھڑے
سچیاں تے گوڑھیاں
جھانجھراں تے چوڑیاں
اکھاں وِچ رہندیاں
وٹنے تے مہندیاں
سِٹھنی تے بولیاں
کھٹ تے گھڑولیاں
گڈڑے تے گڈیاں
بھنگڑے تے لڈیاں
گھگو گھوڑے کجیاں
کِسے نوں نہ پجیاں
کِتھے گئیاں سونے جہیاں
سندھوا اوہ صورتاں
تیرے ساڈے چن جہے
پنجاب دیاں مورتاں
