غزل
جان کاشمیری
عشق دا کھیڈاں جد وی کھیل مَیں
ٹُٹے دلاں نوں دیواں میل مَیں
پاساں وچّوں پہلا پاس وہ
فیلاں وچّوں پہلا فیل مَیں
میرے سارے سنگی اوتھے
جیل نوں سمجھاں کسراں جیل مَیں
ہوکے ہاواں دین سلامی
وَن سوّنے دُکھ دی سیل مَیں
باغ دا لاڑا گھوڑی چڑھیا
ویلاں پُٹ پُٹ دیواں ویل مَیں
ایڈا انّھا میں نئیں ہویا
دیواں انّھے ہاتھ غلیل مَیں
کوئی نہ سوچے میرے دُکھ نوں
ہس کے کراواں سبھ دا میل مَیں
لوک پُٹن دی ٹوہ وچ رہندے
خشبو ونڈدی پھردی ویل مَیں
ٹیشن ٹیشن حُسن مسافر
کلّم کلّی عشق دی ریل مَیں
