غزل
بابا نجمی
اوہدے نال جدوں دی یاری ہو گئی اے
میری دُشمن چار دیواری ہو گئی اے
میلے وچ وی جی نہیں کردا ہسن نوں
جندڑی ایہو جہی دکھیاری ہو گئی اے
ماپیاں کولوں پُتر لین حساب پئے
دنیا کنی کاروباری ہو گئی اے
ورھیاں مگروں ویکھ کے اوہدا اوہیو مُکھ
بڈھی سدھر فیر کواری ہو گئی اے
دھپاں وچ وی ساڈے پنڈے ٹھنڈے نیں
سانوں کتھوں ایہہ بیماری ہو گئی اے
ردی وچوں وارث رومی لبھا میر
کسراں مناں دنیا قاری ہو گئی اے
میرے وچ کمی نہیں بابا اوہناں نوں
اپنے اُتے بے اتباری ہو گئی اے
