غزل
اقتدار جاوید
منتر جپیں مامیا، پھڑکیں ناساں سالیا
چار چفیرے سپ نیں وڈا کنڈل پالیا
چل گیا دا ہک زورواں ادھی راتیں چورواں
کھڑ کھڑ نہ کر کنڈیے کھل جا یکدم تالیا
آئی رات کوئی ہورویں رونق ہے لاہورویں
اٹھ پِیڑے نی وکھیوں پھٹ او مٹھیا چھالیا
روپ کوئی ہے راٹھواں ایہہ منتر ہے پاٹھواں
ایہہ کجھ ہوریں شکل اے اکھ تے جمیا جالیا
ہسدی جاویں راہ وچ کھڑدی پئی کپاہ وچ
کہڑی ماں بلا لیا کس جھرانیں کھا لیا
آ سینے توں بھاریا بھُکھ جا انگ انگیاریا
لے ولہیٹ نی لوئیے نہ لگ اتنا پالیا
نہ کر ایہہ چالاکیاں نہ گھسا انج چاکیاں
ایڈا توں بہروپیا ساڈیا ویکھیا بھالیا
