سہر

ساحل اعوان

کنیاں ورھیاں مگروں، ساڈھے گھار وچ خوشیاں آئیاں
کیتیاں میرے باپو اڑیو، میرے ویر دیاں کڑمائیاں
پجھ گئے ویر دے سنگی بیلی، نالے آئیاں امڑی جائیاں
گدا پاون رل مل سنگیاں، سہرے گاون چاچیاں تائیاں
چاہڑیاں دیگاں رحمت نائی، راشا کڈھے رج مٹھیاں
سدے دیون گھار گھار نیناں، گھار وچ ساڈے رسماں مائیاں
باہر وجن توتیاں واجے، نالے شور پیا شہنائیاں
بھیناں لین واگ پھڑائی، سرمہ پاوندیاں سن بھرجائیاں
ہو تیار سن جانجی آئے، لین لئی کاراں بساں آئیاں
کسے نے پایا تہمد کرتا، کئیاں پینٹاں شرٹاں پائیاں
مل کے بہہ گئے سیٹاں جانجی، گڈیاں لین دے وچ لائیاں
لاڑا ٹر پیا اگے لگ کے، جان دیاں جد گھڑیاں آئیاں
جنج دا ویکھ کے رعب داب، ملکا پچھناں لوکاں لائیاں
اینا بن ٹھن لاڑا آیا، گڈیاں کہڑے دیسوں آئیاں