غزل
طفیل عامر
جھوٹھے ہاسے ہس دے پئے آں
کہڑے پاسے نس دے پئے آں
جے وسناں ایہو جیہا ہندا
فیر تے سجناں وس دے پئے آں
کل ایہہ سارا پنڈ سنے گا
جہڑی کن وچ دس دے پئے آں
کھیڈ کوئی سوکھی نہیں بن دی
چارہ کر کے رس دے پئے آں
اساں نہ جہڑی سنی نہ کیتی
اوسے گل تے پھس دے پئے آں
کھا پی لیندے تے چنگا سی
اج تالو نوں جھس دے پئے آں
تگڑے اگے بول نہ سکیے!
ماڑے نوں اسی دھس دے پئے آں
یار نے وال تخا دتا اے
اسی تے کاٹھی کس دے پئے آں
پینڈا عامر مک دا ای نہیں
جتی دے نل گھس دے پئے آں
