نعت شریف
قیصر محمود گورائیہ
اپنی اوقات توں ودھ آئو جسارت کریئے
نعت سرکارِ دوعالم دی تلاوت کریئے
اوسے در توں ای ملن چین دلاں نوں قسمیں
ساوے گنبد دی چلو چل کے زیارت کریئے
آپۖ دے لئی ایہہ محبت وی اے تھوڑی آقاۖ
جان اپنی توں وی ودھ کے جے محبت کریئے
کملی والے دے کروڑاں نیں کرم ساڈے تے
فیر کیوں نہ اسی سوہنے دی اطاعت کریئے
ویہڑے سخناں دے وچھایا میں مصلیٰ حق دا
آئو لفظو شہِ لولاکۖ دی مدحت کریئے
لفظ یٰسین، مزمل تے مدثر لکھ کے
قلمے قیصر دیئے آ دوویں عبادت کریئے
