غزل
کرم علی کیفی
دیوے گھپ ہنیرے کہڑا بالے گا
ساڈے آل دوالے کون اُجالے گا
فکراں ودھیاں ایس طرح جنگ جت کے وی
جتے ہوئے علاقے کون سنبھالے گا
جعلی سِکّے کسراں بند ہو سکدے نیں
سچ دے سِکّے کہڑا آگو ڈھالے گا
ساڈی صلح تے اج ویری نال ہو گئی اے
کل ساڈے عیباں نوں کون اُچھالے گا
پرھیا دا قانون اج متھیا لوکاں نے
بندہ ہر قرضے نوں کل تے ٹالے گا
کہڑا ماما چھڈ کے ہن انگریزی نوں
ماں بولی وچ رہ کے بچے پالے گا
کتھے ہن اوہ شاعر جہڑا فن پاروں
اپنا شعر اپنی بھٹھی وچ گالے گا
اوہ پیارا تے ٹر گیا ایتھوں کیفی جی
مستقبل نوں جہڑا ویکھے بھالے گا
