نعت

جان کاشمیری

دل دا ویڑھا، اَکھ دی کُلّی ڈیرا ڈیرا روشن ہویا
تیرے ناں دے صدقے میرا چار چفیرا روشن ہویا
سبھ چن تارے اج وی تیرے روضے دے وَل بِٹ بِٹ ویکھن
دھرتی دا ایہہ ٹُکڑا سمجھو فلکوں اُچیرا روشن ہویا
مُک گئی اپنی خانہ بدوشی سوچاں نیں اک پا لیا مرکز
شرک دی لمّی شب گزری توحید سویرا روشن رویا
غار نوں چانن نال کیہ نسبت بخت تے ویکھو غارِ حرا دا
پیریں ڈِگ کے میرے نبیۖ دے جس دا ہنیرا روشن ہویا
تِیلا تِیلا جگنو چمکن پیار دا بن کے نور منارا
یاد جدوں وی کیتا اُس نوں رین بسیرا روشن ہویا
میرا ظاہر، میرا باطن عشق دی ٹھنڈی اگ وچ تَپدا
اَکھ وی میری روشن جاپے دل وی میرا روشن ہویا
میریاں آساں کِکلی پاون صلِ علیٰ دا ورد کماون
دل دی دنیا جگمگ جگمگ، نور پُھریرا روشن ہویا
جان گوانڈی دا حق سانوں دَس دِتّا کملی والے نے
دوئی دی کالخ دُھل گئی ساری سانجھ بنیرا روشن ہویا