شہیداں نوں سلام
غلام شبیر عاصم
اجّ لکھ سلام شہیداں نوں
جو دیس توں جاناں وار دے نیں
گل لا کے لنبو اگاں دے
ماں پیو دا سینہ ٹھار دے نیں
ایہہ نقشہ کھچدے کربل دا
علی اصغر ، غازی ، اکبر دا
لہو دے کے اپنا دھرتی نوں
ایہہ پیا ر دا قرض اتار دے نیں
ایہہ موت دے کولوں ڈر دے نہیں
ایہہ مرکے وی کدے مر دے نہیں
قرآن گواہی دیندا اے!
ایہہ مرکے موجاں مار دے نیں
جنج خوشیاں ہوون عیداں تے
کرے موت وی ناز شہیداں تے
ہِن غازی فخر حیاتی دا!
ایہ موجب چین قرار دے نیں
ایہ پاہرو دیس دے لوکاں دے
مونہہ بھن دے ٹینکاں توپاں دے
ایہہ عاصم مر دے مر جاندے
نہیں دشمن اگے ہار دے نیں
