پنجابی
قیصر محمود گورائیہ
ماں بولی دا بوٹا سِر تے گڈنا اے
سوچاں دا میں اِنج بھلیکھا کڈھنا اے
پیار محبتاں بھری پنجابی بولی نال
نفرت دا میں بوٹا بوٹا وڈھنا اے
اوہبڑ بولی بول نگلا ہویا جو
گل کیہ کرنی اوہنے مونہہ ای ٹڈنا اے
جھوٹھی شہرت والے جھوٹھے طمیاں نے
کھریاں جیبھاں پلے ککھ نہ چھڈنا اے
لفظ پنیری نال میں کُل جہان اُتے
پنجابی دا تیلہ تیلہ گڈنا اے
جہڑا جہڑا جو جو ایتھے بیجے گا
اوہنے اوہنے اوہو اگے وڈھنا اے
شعراں راہیں اک اک بول پنجابی دا
جگ تے عام میں قیصر کرکے چھڈنا اے
