غزل
انجم قریشی
رُکھاں توں ڈگیاں پتراں دی گنتی کون کرے گا
میں تے آپے ای مان نہیں ہن تینوں کون جرے گا
ایس بازی نوں جتے جہڑا’ جت کے آپ ہرے گا
میرے نال تے اوہ جیوے جو میرے نال مرے گا
تیرے جون وچ اے مرنا’مرنے وچ حیاتی
انتم گھت تک ڈبن والا’ تیرے نال ترے گا
کنے ویکھے گلاں کردے’ ودھ ودھ اگے ہوندے
مینوں تھلے لاہ کے کہڑا میری دار چڑھے گا
کس دی جند اسارے جندڑی’ کنہوں تھلے لاوے
سولی ٹنگی جندڑی اندر کہڑا ساہ بھرے گا
