کاتبا میرے لیکھ سنوار
عبدالحمید نظامی
دل تتڑے نوں دیوے ٹھار موسم طیبہ دا
ویندا اے جد اوگن ہار موسم طیبہ دا
گھیری رکھدے سن دُکھڑے ، مینوں رب دی سونہہ
ویکھ کے لہہ گئے سارے بھار موسم طیبہ دا
طیبہ دے وچ دسے جسراں بدل رحمت دا
دل تے وسدی پئی پھوار موسم طیبہ دا
قطرہ تیری رحمت دا اک سمندر اے
سانوں مِل جاوے سرکار موسم طیبہ دا
عاصیاں تائیں خوشخبری ونڈے پئی خشبو
میرے ورگے اوگن ہار موسم طیبہ دا
ایتھے آکے جاون دا ہن نہیں دل کردا
کاتبا میرے لیکھ سنوار موسم طیبہ دا
سانوں ملدا بن منگیاں ایناں کافی اے
شُکر کراں میں لکھ لکھ وار موسم طیبہ دا
ایتھے اُوتھے یار نظامی تیریاں موجاں
ویندا رہیں گا سدابہار موسم طیبہ دا
