غزل

اقتدار جاوید

کالی رات دی مٹھ چوں نکلی چٹی ددھ سویر
پانی وچ نہا کے چڑیاں شور مچایا فیر
مینہ ورھدے دی اوکھت دے وچ تتے ساہ نوں کھچ
ست رنگاں دیئے برکتے سانوں چارچفیروں گھیر
کس کے جوگر نکل سویرے سڑکیں لگن رنگ
ادھر پدھر کر دے چیزاں پھیر سہاگہ پھیر
اگے پچھے سرخ نشان نیں ناڑے والی تھاں
کجھ نہیفے دے وچوں وچوں تے کجھ نہیفیوں زیر
فجریں فیر تماشا اوہو لہو نال بھجی وأ
انھ مچاندا ویکھ نہ سکے آپ اوہ انھا شیر
نیڑے اَوندے پکھنواں دے ایہہ پراں دی شوکر ہے
اکھ دی اوٹ چ وسدا ہسدا تکیا چار چفیر
سخر دوپہرے لوکی سارے گھراں چ سُتے پئے
کالے سُفنے دے وچ پھسے دو ممیر پھپھیر