چودھویں رات دے چن دے ناں
پیر فقیر ویر سپاہی
اج چودھویں رات دا چن چڑھیا
نور لشکیا کاظمی پیر آیا
دیوا شاہ منیر دا ویکھ بلدا
جتی ستی اک سید فقیر آیا
محفل فقر فقیری سج گئی سی
بن فقر دی سوہنی تصویر آیا
کوئی منکر گستاخ نہیں ٹپ سکدا
مار پتھر تے ایسی لکیر آیا
وسے دارالمعارفاں ننکانہ
جتھوں عشق دا سچا سفیر آیا
کھری معرفت حق دی ونڈ دا اے
عشق حسن دا کرن اسیر آیا
ازلوں جانو اے عشق حقیقتاں دا
کامل مرد کوئی رند فقیر آیا
دولت فقر دی بوہت اے کول اوہدے
علم ادب دی ونڈن جاگیر آیا
روح بُت دے جھیڑے دا دھروں جانو
وارث شاہ دی پرکھن لئی ہیر آیا
لنگھی گھپ ہنیرڑی رات کالی
گھپ نھیرے چ بن تنویر آیا
سید پیر فقیر درویش سچا
دل روح تے روشن ضمیر آیا
ولی کامل درویش تے مست سوہنا
ٹالن واسطے بُری تقدیر آیا
جوڑ جڑیا رہوے جے بندیاں دا
گنڈھن ازلی سانجھ تے سیر آیا
ست ارب انساناں لئی اک سدا
بھلے جتھے دا رہبر امیر آیا
علی نبی دے باغ دا پھُل سوہنا
لے کے سچ دی مہک تاثیر آیا
ڈنگی چبی کیوں امت دی سوچ ہو گئی
کرن ساریاں نوں سدھا تیر آیا
وچ عشقِ دے تھلاں دی ریت چھانی
کوئی ست سمندر اے چیر آیا
نین جیہڑے فقیر دا راہ ویکھن
اوہو ویر جی انت اخیر آیا
