دیس واسیاں لئی دُعا
سلیم نجمی
ساریاں عذاباں نوں دے ٹال مالکا
امناں چہ لنگھے سارا سال مالکا
سدا خشیاں تے ہاسے ہون ہر پاسڑے
پیار دا نہ پوے کدی کال مالکا
رج رج کھان تے ہنڈان واسی میرے دیس دے
ہر کوئی ہووے ایتھے خشحال مالکا
سبھناں دا مُکھ ہووے پھُلاں وانگوں کھڑیا
بھُکھاں والا ہووے نہ جنجال مالکا
کدی وی نہ ہون بمباں دے دھماکڑے
ہووے دھرتی نہ کدے لال مالکا
رکھیں اپنے امان وچ سدا سبھ نوں
دُشمناں دی چلے نہ کوئی چال مالکا
منگدا اے ایہو ای دعاواں نجمی
ٹال میرے دیس توں زوال مالکا
