غزل

اقتدار جاوید

جون شالا ساڈیاں ایہہ نانیاں تے دادیاں
عرب پاکوں آیاں ہویاں پاک عرب زادیاں
سڑکاں دے جال وچ بڈھے واری پھس گئے
گھیر لیا ساڈا چک وڈیاں ابادیاں
ساتھوں تے ملامتاں دا بھار نیں چکی دا
ڈھڈ پیڑ اوہناں جنہاں گاجراں نیں کھاہدیاں
بھل گیا پیچھا سارا پیکے کِتے رہ گئے
بھار سارا چک لیا سادیاں مرادیاں
مک گئے نیں گیت میت بھل گئیاں بولیاں
سک گئے نیں کھوہ روح ٹٹ گئیاں گادھیاں
دادکا آباد ہے تے نانکا وی شاد ہے
تکن دوہتر واناں دیاں شادیاں آبادیاں
تہانوں وی نبیڑدے ہاں واری اون والی ہے
رولا کہڑا چیز دا ہے کاہلیاں جے کاہدیاں
ماواں دھیاں بہہ بہہ دکھ سکھ پھولناں
ملکو بے ملک کیتا ایہناں آزادیاں
رل گئیاں اک مک ہو گئیاں گند وچ
کس نال گل کوئی کرن عرب زادیاں