غزل

انور اُداس

ہنیرے دی جگہ میں چار سُو تنویر کرنی اے
میں اپنے شہر وچ ایویں دی ہُن تدبیر کرنی اے
بُرائی نوں مٹاون دا جتن کرنا اے ہر ویلے
زمانے تے سدا نیکی دی میں تشہیر کرنی اے
میں ہتھ رکھنا اے ہر نِکّے دے سر تے شفقتاں والا
بزرگاں دی میں ہر تھاں تے دِلوں توقیر کرنی اے
میں اَج محفوظ کرناں ایس لئی اسلاف دے قِصّے
میں اِس بُنیاد تے اگلی نسل تعمیر کرنی اے
مِرے الفاظ وی ہُن روشنی وَنڈّن گے دُنیا تے
میں اُچّے بخت کرنے نیں کھری تقدیر کرنی اے
امن تے پیار دا پرچم میں لہرانا اے دھرتی تے
میں ایہ دھرتی بہشتاں دی کوئی تصویر کرنی اے
میں آؤندے دَور دا نقشہ وی انورؔ پیش کرنا اے
میں اپنے دَور دی تاریخ وی تحریر کرنی اے