اج دی رات

احمد راہی

اج دی رات اخیر وے رانجھن
قصہ بن جائو ہیر
ڈھاواں مارن گے ہن بیلے
کھیہہ اڈاون گے اوہ ویلے
جنہاں دے اوہلے اک مک ہوئی
میری تیری تقدیر وے رانجھن
اج دی رات اخیر
جاندیاں گھڑیاں ڈنگ دیاں جاون
اوندیاں گھڑیاں اُڈدیاں آون
جاندیاں اوندیاں گھڑیاں مل کے
گھیر لئی تدبیر وے رانجھن
اج دی رات اخیر
آخری واری درد ونڈالے
ہیر دے پیار نوں ہک نال لالے
دن چڑھدے تائیں کھلر جاسی
ساہواں دی زنجیر وے رانجھن
اج دی رات اخیر