بول او عشقا بول
جان کاشمیری
ہاواں بھر بھر کندھاں چُکیاں
ہف دے ہف جیباں سُکیاں
لتّاں دے شہتیر کٹائے
بانہواں دے میں بالے بنائے
پلکاں دے میں کانے جوڑے
تن دی کر کے بوٹی بوٹی
عطر سمندر غوطہ دے کے
عشق دا وکھرا چھپّر پایا
ہنجواں دا فِر چھٹّا لایا
نکّے وڈّے سب چاواں نوں
دل دی رَت وچ ڈوب کے چنگا
لُوں لُوں خنجر چُوب کے چنگا
اپنی روح دی گھانی کر کے
عشق دا تینوں بانی کر کے
اندرو باہروں کر کے تسلّیٰ
فیر میں کیتی خوب لپائی
اپنا گہنا ایہو کمائی
ٹیساں نوں میں اک تھاں کر کے
عشق مصلّیٰ آپ بنایا
اِس وچ تیرا درد وسایا
پل وچ اپنا آپ مٹایا
ہون تے عشقا! دل دی گل دس
خوش ایں، راضی ایں کُھل کے بول
عشق ترازو دا پلڑا کھول
سسّی چھڈ دے پنّوں چھڈ دے
عشق دے پشلے قصّے چھڈ دے
دونویں پلڑے جاون گے ڈول
اَج سانوں عشق ترازو تول
بول او عشقا! بول
سچ دا بوہا کھول
