غزل
حسین شاد
صدیاں جیویں کھڑیاں ہوون وچ اوہناں دے سال ٹرے
لے حیاتی روپ کھلارے اندر ساہ دی تال ٹرے
رُتاں سپیاں رنگ برنگے موتی ونڈن آئیاں نیں
ان ڈٹھے انمول خزانے وقت سمندر نال ٹرے
سفراں دے انجام تے آخر جھوک رانجھن دی اوناں اے
ہیراں پیار مسافر تھیاں کیدو پالو پال ٹرے
شجراں دے ارمان ہواواں پتے بال ایانے نیں
ٹونے ہاری دھرتی ہسی مار کے ڈالوں چھال ٹرے
ہجراں دے اسرار پرانے صحرا صحرا کھلرے نیں
وصلاں دے انمول فسانے شادؔ چنھاواں نال ٹرے
