غزل
ملک ارشاد
منگاں سدا دعاواں ربا
کر دے معاف خطاواں ربا
تیرا بوہا چھڈ کے دس میں
کس بوہے تے جاواں ربا
اپنے خاص فضل نال ٹالیں
ساڈے سروں بلاواں ربا
تیرے اگے تیری قسمے
نت میں سیس نواواں ربا
تیتھوں کجھ وی اولھے نہیں تے
میں کیوں پردے پاواں ربا
تیرے باہجوں دل دے دُکھڑے
کس نوں ہور سناواں ربا
لے کے چنگے عمل میں آواں
تیں وَل جد وی آواں ربا
ہر اک شے تے قبضہ تیرا
مُکدی گل مُکاواں ربا
ہووے جد ارشاد تساں دا
آون راس فضاواں ربا
