نعت شریف
حفیظ تائب
پیار نبیؐ دے پر لائے نیں شعراں نوں
بخشی نویں حیاتی میریاں سوچاں نوں
اوہدی سیرت سدھا رستہ دَسے گی
حشر سمے تک آون والیاں نسلاں نوں
اوہدا اسوہ کافی اے ہر دور لئی
ہن نہیں لوڑ کسے رہبر دی لوکاں نوں
اوسے دا دستور مبارک ہے جہڑا
پوریاں کرسی ہر ویلے دیاں لوڑاں نوں
رب نے دین مکمل کیتا اوسے تے
اوسے نے چمکایا ساریاں قدراں نوں
چانن دے ول اوسے آ کے ٹوریا سی
نھیریاں وچوں کڈھ کے سب انساناں نوں
سنگل کٹّے اوسے آن غلامی دے
جیون دا حق دتا سب مجبوراں نوں
اوسے دی اک جھات دے اکھر طالب نیں
دتیاں بخش زباناں جس نے روڑاں نوں
