غزل
طالب چشتی
حیاتی بناون دی کوشش کراں گے
غماں نوں مٹان دی کوشش کراں گے
سمے دے جے ویہڑے وچ رہیا ہنھیرا
دلاں نوں جلاون دی کوشش کراں گے
نگاہواں دا ملناں نصیباں دا میلہ
نگاہواں ملاون دی کوشش کراں گے
بہاراں نہ آئیاں جے گلشن وچ ساڈے
خزاں نوں مناون دی کوشش کراں گے
ذرا ٹھہر جا اے زمانے دی گردش
ذرا مسکراون دی کوشش کراں گے
دلاں نوں ہساوناں عبادت دا کم اے
دلاں نوں ہساون دی کوشش کراں گے
اُمیداں دی اُجڑی ہوئی راہ وچ طالب
ستارے وچھاون دی کوشش کراں گے
