سرکار تہانوں پھبدے نیں

عبدالحمید نظامی

عزتاں والے سب القاب سرکار تہانوں پھبدے نیں
دو جگ دے سب ادب آداب ، سرکار تہانوں پھبدے نیں
سبھے مہکاں پھُل کلیاں تہاڈے در عنبر کستوری
وچ تعظیماں کھڑے گلاب ، سرکار تہانوں پھبدے نیں
جزماں نقطے غُنّے سب شداں مداں زبراں زیراں
تہاڈی شان چ پیش اعراب ، سرکار تہانوں پھبدے نیں
اپنے نور توں پیدا کر کے سب نبیاں تو ں آخر گھلیا
اوہدی حکمت والے باب ، سرکار تہانوں پھبدے نیں
دید لئی جد بُلایا سی لامکانی عرش عُلا تے
رکھنے پاک نعلین جناب ، سرکار تہانوں پھبدے نیں
غاراں دے وچ رو رو کے منگی اے بخشش شب اسرا
امت لئی سب اضطراب ، سرکار تہانوں پھبدے نیں
تہانوں صفتاں نال بلایا یٰسین مُدثّر کہہ کہہ کے
سب الفاظ عزت مآب ، سرکار تہانوں پھبدے نیں
جبرائیل وی سمجھیا ناہی ہور نظامیؔ کیہہ سمجھے کوئی
اﷲ دے سب راز حجاب ، سرکار تہانوں پھبدے نیں