یوم مئی
عبدالحمید نظامی
نہ ہو غافل بن ہشیار
مزدورا نہ ہمت ہار
توں ایں دیس دا مان تران
کم اپنے نوں جان سیہان
مشکل اگے سینہ تان
کجھ تے کر ہن سوچ وچار
مزدورا نہ ہمت ہار
گلاں باتاں وچ نہ رُجھ
کم کر دیس لئی توں کجھ
سجناں اپنی منزل بجھ
کم اپنے نال رکھ پیار
مزدورا نہ ہمت ہار
غداراں توں جاویں بچ
جھوٹھ نہیوں ایہہ سچ ای سچ
کر لے ایہناں نال توں کچ
ایخو جیہاں تے پا پھٹکار
مزدورا نہ ہمت ہار
ملاں تیریاں رہن سلامت
قائم رہون ایہ تا قیامت
تینوں بخشی رب نیامت
اوسے دا رہو شکر گزار
مزدورا نہ ہمت ہار
کہوے نظامی گل اخیر
دیس دی کر توں نویں تعمیر
آپ بدل اپنی تقدیر
رل مل محنت کریئے یار
مزدورا نہ ہمت ہار
