رَمزاں
ڈاکٹر فوزیہ حنیف
گھوک ہنیری رات اندر
کئی رمزاں لُکیاں نیں
جد اسمانیں ویکھاں
بدلیاں انج لگن
جیویں ہنیرے جنگل وچ
خیالاں دیاں پُونیاں کِھلریاں نیں
ایس رات دے سینے وچ
لکھاں درد منداں دیاں آہاں
رو رو مشعلاں بنیاں نیں
باہجھ ہجر منزل لبھدی نہیں
ایس حقیقت توں گھُنڈ چُکدیاں نیں
نفی اثبات نوں جانن والیاں
عشق حقیقی پائوندیاں نیں
اپنے ای اتھروواں دے سمندر وچ
روندیاں تے کُرلائوندیاں نیں
راتیں سون والیاں کیہ جانن
عشق نظاریاں دیاں کیہ لذّتاں نیں
سدھراں سولی اُتے چڑھدیاں نیں
ایہو عشق دیاں قدیمی ریتاں
رمزاں اندر لُکیاںنیں
