غزل
بابا نجمی
ساڈا حق نہیں دیندے جہڑے ایسی تیسی اوہناں دی
ہون نہیں دیندے کھلے ویہڑے ایسی تیسی اوہناں دی
دل دی بوٹی لے کے وی نہیں رَجی نیت جہناں دی
بھاویں ہتھیں آپ سہیڑے ایسی تیسی اوہناں دی
ونڈن والیاں لیکاں کھچن جہڑے آدم جایاں نوں
اوہ شیطانی چرخے کہڑے ایسی تیسی اوہناں دی
سانوں امن دی گڑھتی دے کے بنھیا ساڈے وڈیاں نے
نہیں تے جہڑے کہن مریڑے ایسی تیسی اوہناں دی
ناں تے میرا وی اے رانجھا پر میں ونجھلی والا نہیں
ڈھکن تے سہی بابا کھیڑے ایسی تیسی اوہناں دی
