منقبت مولا علی شیرخدا

عبدالحمید نظامی

علیؓ دا نعرہ جس ویلے کوئی لاوندا
ہر اک دکھڑا اوہنوں ہے بھل جاوندا
منیا سارے جگ خدا دے شیر نوں
فاتح خیبر ، حیدر اوس دلیر نوں
پھڑ کے بانہہ اوہ رب دے نال ملاوندا
علیؓ دا نعرہ جس ویلے کوئی لاوندا
مولا علیؓؓ نوں شاناں ملیاں خوب نیں
ایویں تے نہیں مولا دے محبوب نیں
شہر علم دا در علیؓ کہلاوندا
علیؓ دا نعرہ جس ویلے کوئی لاوندا
کُل ولائیتاں والا سرتے تاج اے
پیر علیؓ دی ہر ہر پاسے واج اے
پیر علیؓ ہے ڈُبیاں بنے لاوندا
علیؓ دا نعرہ جس ویلے کوئی لاوندا
فاقے کر دے اُنج سخی سُلطان نے
رب نے لائے نانویں دوجہان نے
منگتا آپ دا بادشاہی ورتاوندا
علیؓ دا نعرہ جس ویلے کوئی لاوندا
کملی والا خود جہدے نال پیار کرے
اپنی الفت والا رب اِظہار کرے
اللہ دی تلوار علیؓ کہلاوندا
علیؓ دا نعرہ جس ویلے کوئی لاوندا
یار نظامیؔ علیؓ دی دساں شان اے کیہہ
آون والیاں تائیں کردا دان اے کیہہ
قطرہ منگے دریا جھولی پاوندا
علیؓ دا نعرہ جس ویلے کوئی لاوندا