غزل

قیصرمحمودگورایہ

توں ٹریوں سنگ شریکاں دے اسی وہندے دے وہندے رہے
بدل گئے رنگ شریکاں دے اسی وہندے دے وہندے رہے
اوہ کہندے سن تِری ڈولی اسی کھڑ کے وکھاواں گے
لے رہ گئے لنگ شریکاں دے اسی وہندے دے وہندے رہے
جہڑے ہتھ ساڈی کُھنگی نال کُھنگی پا کے رکھدے سی
اوہ بن گئے منگ شریکاں دے اسی وہندے دے وہندے رہے
دیہاڑے عید دے سجنا! تری بانہہ تے جدوں ویکھے
’’کڑا تے ونگ‘‘ شریکاں دے اسی وہندے دے وہندے رہے
بروہاں وچ اساں نوں روندیاں چھڈ کے تُسی ہس کے
بوہوں گئے لنگ شریکاں دے اسی وہندے دے وہندے رہے
بھراواں بھابیاں دے مہنیاں قیصرؔ چھڈایا پنڈ
پے کے وس جھنگ شریکاں دے اسی وہندے دے وہندے رہے