غزل

ارشدمنظور

اکھیں نوں ہن کسے دی رہندی اڈیک نئیں
میرے غماں چہ ہویا کوئی شریک نئیں
چپ رہ کے نئیں گزارا پینا ایں بولنا
ظلماں نوں سہنا لوکو گل ایہہ وی ٹھیک نئیں
آنڈھی گوانڈھی چپ نیں کناں توں بولے ہوئے
ساڈی زمانے اُتے سن دا کوئی چیک نئیں
ایہہ لیک نفرتاں دی پے گئی اے سوچ وچ
پٹدے پئے نیں جہنوں اوہ سپ دی لیک نئیں
نزدیکیاں چہ رہ کے ہوئیاں نیں دوریاں
تیرے وی کول رہ کے میں تیرے تیک نئیں
کسراں کراں گے یارو جگ تے ترقیاں
موٹے دماغاں اندر سوچاں بریک نئیں
آوے گا وقت چنگا ارشد امید رکھ
رہنی خزاں ہمیشہ پتھر تے لیک نئیں