غزل
محمدحنیف ساقی
چانن ونڈن والے جگ توں رات مکا کے ٹر جاندے نیں
سورج وانگوں بندے اپنا فرض نبھا کے ٹر جاندے نیں
کل تیکر تے سوگ پرایا سب دا سانجھا ہندا سی
ہن تے لوکی قبرستان شکل وکھا کے ٹر جاندے نیں
مونہہ رکھنی دیاں جنجاں نے تے مونہہ رکھنی دے بھورے نیں
غیراں وانگوں اپنے وی ہن پھیرا پا کے ٹر جاندے نیں
اچے محل اسارن والے جینا سکھن اوہناں توں
ککھاں دی جو کلی اندر عمر لنگھا کے ٹر جاندے نیں
رنداں اتے فتوے لا کے ملاں خورے کاہدے لئی
میخانے وچ چپ چپیتے دو گھٹ لا کے ٹر جاندے نیں
جیکر تینوں کڈھ نیں سکدے ساؔقی تیریاں دکھاں چوں
کاہنوں ’’سوچ دی سولی ‘‘اتے یار چڑھا کے ٹر جاندے نیں
