پنجابی یونین دے پربندھ ہیٹھ شگفتہ گمِی لودھی دی کتاب”کینسر تے اوہدیاں قِسماں”دا مُکھ وکھالی اِکٹھ

لہور(پنجابی میڈیا گروپ)پنجابی یونین دے پربندھ ہیٹھ پچھلے دِناںUK وَسن والی پنجابی زبان و ادب دے وَدھا لئی کم کرن والی شگفتہ گمِی لودھی دی کتاب”کینسر تے اوہدیاں قسماں” دا مُکھ وکھالی اِکٹھ ہویا،جس دی میزبانی پنجابی یونین دے چیئرمین مدثر اقبال بٹ ہوراں کیتی،تقریب دی صدارت معروف صحافی رہنما بابر ڈوگر ہوراں کیتی،اُچیچے پروہنیاں وِچ پنجابی میڈیا گروپ دے صدر ندیم رضا،اعجاز خان ایڈووکیٹ چیف ایڈیٹر روزنامہ الجلال سرگودھاشہزادشیرازی،ڈپٹی بیوروچیف سچ ٹی وی رانا کامران،بیو روچیف سچ ٹی وی حنیف قمر،معروف صحافی قاضی طارق عزیزشامل سَن۔میزبان مدثر اقبال بٹ نے اِکٹھ نال خطاب کردیاں ہویاں آکھیا کہ پنجاب ہاؤس نے ہمیشہ پنجابی وِچ لکھن والیاں دی حوصلہ افزائی کیتی اے۔شگفتہ گمی لودھی اوہناں لوکاں وِچ شامل نیں جناں نے پنجابی دے وَدھا لئی کام کیتا اے، اوہناں دی ایہ کتاب”کینسر تے اوہدیاں قسماں”پنجابی کتاباں دے خزانے وِچ اک قیمتی وَدھا اے۔پنجابی وِچ لکھی جان والی ایس کتاب توں پنجابیاں وِچ کینسر وَرگے موذی مرض دے حوالے نال آگاہی پیدا ہوئے گی۔اعجاز خان ایڈووکیٹ نے آکھیا پنجابی وِچ اینج دی کتاب بوہت ضروری سی ایس کتاب نوں پڑھن نال کینسر وَرگے موذی مرض دے حوالے نال آگاہی ملدی اے تے خوف دی بجائے ایس بیماری نال لڑن دا حوصلہ پیدا ہندا اے ایہ مدثر اقبال بٹ دا بوہت چنگا قدم اے کہ پنجابی مصنفاں دی حوصلہ افزائی لئی اینج دے اِکٹھ کردے رہنا چاہیدے نیں۔رانا کامران نے آکھیا کہ ماں بولی وِچ گَل نوں سمجھنا آسان ہندا اے تے شگفتہ گمی لودھی نے اینہے اہم موضوع اُتے پنجابی وِچ لکھ کے بوہت اعلیٰ کم کیتا اے ایس نال اپنی ماں بولی وِچ اینیاں قیمتی معلوماتاں نوںسمجھن وچ پڑھن والیاں نوں آسانی ہوئے گی۔ حنیف قمر نے آکھیا کہ شگفتہ گمی لودھی دا پنجابی دے ودھا لئی وڈا کم اے اوہناں نے کینسر تے اوہدیاں قسماں لکھ کے میڈیکل دے شعبے نوں وی پنجابی دسترس وِچ لیان لئی پہلا قدم چُکیا اے۔معروف صحافی قاضی طارق عزیز نے آکھیا کہ طب دے حوالے نال پنجابی وِچ لکھے جان دی اشد ضرورت سی ایس کمی نوں پورا کرن ول شگفتہ لودھی دا ایہ پہلا قدم اے اُمید اے کہ ایہ سلسلہ اگے وی اینج ہی چلدا رہے گا،پنجاب ہائوس دا ایہ اعزاز اے کہ جس نے وی ماں بولی وچ کجھ وی لکھیا اوس دی حوصلہ افزائی کیتی جس دا سہرا مدثر اقبال بٹ دے سر اے۔پنجابی میڈیا گروپ دے صدر ندیم رضا نے آکھیا کہ پنجاب ہاؤس تے پنجابی لازمی تے ملزوم اے مدثر اقبال بٹ اینج دا کوئی موقع ہتھوں نہیں جان دیندے جس دے ذریعے ماں بولی وِچ لکھن والیاں دی حوصلہ افزائی ہو سکے۔شگفتہ گمی لودھی نے جناں سادیاں لفظاں وِچ اینہی پیچیدہ بیماری دے بارے وچ معلوماتاں دا ذخیرہ جمع کر دِتا اے جس نوں سمجھن پڑھن والیاں لئی ذرا مشکل نہیں۔شہزاد شیرازی نے آکھیا کہ پنجابی دے حوالے نال پنجاب ہاؤس اک تریخ رقم کر رہیا اے کہ ایتھے پنجابی وِچ لکھن والیاں دی بھرپور حوصلہ افزائی کیتی جاندی اے،شگفتہ لودھی دی کتاب گو کہ کینسر ورگے مرض دی قسم اُتے لکھے گئے آرٹیکلز دا پنجابی ترجمہ اے ایہ اعلیٰ پائے داکم اے۔