پاکستان نوں اندر توں توڑن دی سازش

لكهت:قیوم نظامی

بھارتی لیڈراں دی ویڈیو سوشل میڈیا اُتے موجود اے جنہاں وچ اوہ برملا ایہہ دعویٰ کردے ہوئے وکھائی دیندے تے سنائی دیندے نیں کہ پاکستان نوں اندر توں توڑن لئی ہر ممکن کوششاں کیتیاں جان گیاں۔ بھارتی فوج دا ریٹائرڈ افسر کلبھوشن جیہڑا اج کل پاکستان دی حراست وچ اے ایس امر دا کھلا ثبوت اے کہ بھارت پاکستان نوں اندرونی طور اُتے عدم استحکام دا شکار کرن لئی ہر ممکن کوشش کر رہیا اے۔ سی آئی اے موساد تے را مشترکہ طور اُتے پاکستان دے خلاف مختلف نوعیت دی سازشاں کردیاں چلیاں آ رہیاں نیں ایہناں خفیہ ایجنسیاں نے مقدور بھر کوشش کیتی کہ پاکستان ایٹمی قوت نہ بن سکے ۔ اک دو موقعے اُتے کہوٹہ لیبارٹری نوں تباہ کرن دا منصوبہ وی بنایا گیا جیہڑا پاک فوج دی خفیہ ایجنسیاں دی پیشہ ورانہ مہارت دی وجہ نال پورا نہ کیتا جا سکیا۔ بھارت نے جس طریقے نال ایم کیو ایم دے لیڈر الطاف حسین نوں کراچی نوں جناح پور بنان لئی استعمال کیتا تے پاکستان توڑن دی سازش کیتی ایس دی تفصیل تاریخ دے ریکارڈ اُتے موجود نیں انج دی ویڈیوز وی ریکارڈ اُتے موجود نیں جیہڑے ایس سلسلے وچ ناقابل تردید ثبوت دے طور اُتے پیش کیتی جا سکدی اے۔ بلوچستان کراچی اندرون سندھ دے کجھ علاقیاں تے خیبر پختونخوا وچ علیحدگی پسندی دی خفیہ تے ظاہری تحریکاں چلدیاں رہیاں نیں۔ پاکستان دے عوام دی واضح اکثریت چوں کے محب وطن اے ایس لئی علیحدگی پسندی دی تحریکاں کامیاب نہ ہو سکیاں۔ پاکستان دے اک سینئر صحافی جنہاں نے پاکستان دشمناں دے بارے وچ سنجیدہ تحقیقی کم کیتا اے تے ناقابل تردید شواہد دی بنیاد اُتے کتاباں تحریر کیتیاں نیں۔ اوہناں نے راقم نال گل بات کردے ہوئے کہیا کہ سی آئی اے تے را دی ہمیشہ توں ایہہ کوشش رہی اے کہ ایہناں نوں پنجاب دے صوبے وچ کوئی انج دا پاپولرلیڈر مل جائے جیہڑا پاک فوج نوں کمزور کرن لئی ایہناں دے سکرپٹ اُتے عمل کر سکے۔ پاکستان دی بدقسمتی تے پاکستان دشمناں دی خوش قسمتی کہ ایہناں نوں میاں نواز شریف دی صورت وچ انج دا لیڈر مل گیا اے جیہڑا تن وار پاکستان دا وزیراعظم منتخب ہو چکیا اے تے جس دے کول پنجاب وچ ووٹ بنک موجود اے۔ میاں نواز شریف پنجاب دے پہلے لیڈر نیں جنہاں نے پاک فوج نوں براہ راست ناں لے کے تنقید دا نشانہ بنانا شروع کیتا اے۔ بلوچستان حالت جنگ وچ اے، میاں نواز شریف نے بلوچستان دی حساسیت نوں نظر انداز کردے ہوئے کوئٹہ دے جلسے نال انتہا پسندانہ خطاب کیتا جس نال ایہناں دے اصل عزائم ساہمنے آ گئے ، بلاول بھٹو نے کوئٹہ جان توں گریز کیتا، میاں صاحب جدوں وی ریاست مخالف خطاب کردے ہوئے سب توں زیادہ خوشی بھارت دے اندر منائی جاندی اے۔
سینئر صحافی دے مطابق انج محسوس ہوندا اے کہ جویں میاں نواز شریف دے ذاتی مفادات تے خفیہ ایجنسیاں دے مفادات مشترک ہوگئے نیں۔ میاں نواز شریف چاہندے نیں کہ ایہناں دے خلاف قائم کیتے گئے سارے مقدمے ختم کر دتے جان تے ایہناں توں لٹی ہوئی دولت دا واپسی دا مطالبہ نہ کیتا جائے۔ پاکستان دشمن ایجنسیاں دا ایہہ منصوبہ اے کہ پنجاب دے پاپولر لیڈر نوں استعمال کر کے پاک فوج نوں کمزور کیتا جائے تے پاک فوج دے بارے وچ عوام دے ذہناں وچ شک پیدا کر کے ایہناں دے وچکار خلیج پیدا کر دتی اے۔پاکستان دے اک ریٹائرڈ جرنیل نے ناں نہ لکھن دی شرط اُتے دسیا کہ پاکستان دی ریاست بوہت مضبوط اے میاں نواز شریف جس راہ اُتے چل پئے نیں ایہناں دا حال وی الطاف حسین جہیا ہوئے گا تے ایہناں لئی برطانیہ وچ سیاسی پناہ لین دے علاوہ ہور کئی راہ نہیں بچے گا۔ ایم کیو ایم وانگوں پاکستان وچ وی میاں نواز شریف دے ووٹ بینک نوں نقصان اپڑے گا تے مسلم لیگ نون دے اندر ونڈ وی کھل کے ساہمنے آ جائے گی۔ پی ڈی ایم دی اپوزیشن جماعتاں جیہڑی خواب ویکھ رہیاں نیں اوہ پورا ہون والا نہیں۔ جمہوریت وچ سپیس دیندی پیندی اے جیہڑی اپوزیشن جماعتاں نوں دتی جا رہی اے۔ ملک دا اندرونی استحکام مضبوط ہتھاں وچ اے۔ وفاقی وزیر برائے پارلیمانی امور ڈاکٹر بابر اعوان نے ٹیلی فون اُتے راقم نال گل بات کردے ہوئے دسیا کہ حکومت نے اپوزیشن جماعتاں نال چار مہینے تیکر لمبے مذاکرات کیتے تے عوامی و قومی مفادات دے سلسلے وچ قانون سازی لئی مفاہمت دی کوشش کیتی اے۔ اپوزیشن جماعتاں نال ایہہ مذاکرات صرف ایس لئی کامیاب نہ ہو سکے کہ اپوزیشن جماعتاں اپنے خلاف مقدمیاں دے سلسلے وچ این آر او چاہندیاں سن۔ پاکستان دے وزیراعظم عمران خان اپنے ایس موقف اُتے ڈٹے ہوئے نیں کہ اوہ کسے صورت اپوزیشن دے لیڈراں نوں این آر او نہیں دین گے۔ ایہناں نوں جے وزارت عظمی توں مستعفی ہونا پیا تے اوہ مستعفی ہو جان گے تے دوبارہ الیکشن وچ جانا گوارا کر لین گے۔ اوہناں نے دسیا کہ اپوزیشن لیڈراں دے نمائندے آرمی چیف نال وی ملاقاتاں کردے رہے نیں پر جدوں آرمی چیف نے سیاسی تے عدالتی امور وچ مداخلت کرن توں انکار کر دتا تے اوہناں نے مایوس ہو کے احتجاج دا راہ اپنایا اے۔ اپوزیشن دا خفیہ ایجنڈا اوہ ای اے کہ عوامی بھار پا کے کرپشن دے مقدمیاں دے سلسلے وچ ریلیف لے سکن۔ ڈاکٹر بابر اعوان نے کہیا کہ اپوزیشن دا کوئی حربہ کامیاب نہیں ہوئے گا۔
پاکستان پیپلز پارٹی دے مرکزی رہنما آصف علی زرداری تے بلاول بھٹو دونویں وڈے محتاط نیں اوہ مسلم لیگ نون دے ریاست مخالف بیانیے نال اتفاق کرن اُتے آمادہ نہیں ۔ پی پی پی شہیداں تے غازیاں دی جماعت اے۔ پی پی پی دے لیڈراں نے پاکستان تے عوام لئی اپنی جاناں دے نذرانے پیش کیتے نیں ایس لئی ایہہ ممکن ای نہیں کہ پی پی پی دے لیڈراں ایس حد تیکر چلے جان جس حد تیکر میاں نواز شریف جا چکے نیں۔ اعتماد دے نال ایہہ کہیا جا سکدا اے کہ پی پی پی کسے نہ کسے مرحلے اُتے اپوزیشن اتحاد توں وکھری ہو جائے گی۔ میاں نواز شریف اپنے ریاست مخالف بیانیہ دی وجہ نال عوام وچ ایکسپوز ہوندے جان گے میاں نواز شریف نوں ریاست مخالف بیانیہ دے نال اپنی جماعت دے لیڈراں خاص طور تے اراکین قومی تے صوبائی اسمبلی نوں اپنے نال رکھنا ممکن نہیں ہوئے گا۔ احتساب دا شکنجہ مزید سخت ہوئے گا۔ نون لیگ دے اکثر لیڈر میاں نواز شریف دے بیانیے دی وجہ نال گرفتار کر لئے جان گے۔ کئی لیڈر رضا کارانہ طور اُتے آپ ای گرفتار ہونا پسند کرن گے تاں جے ایہناں نوں ریاست مخالف احتجاج دا حصہ نہ بننا پئے۔ لیڈراں دی گرفتاریاں دے بعد پی ڈی ایم دی تحریک کمزور پئے جائے گی۔