پِلاک دے پربندھ ہیٹھ منظور اعجاز دی کتاب’’ متشو بھاشو‘‘ دی مُکھ وکھالی
رپورٹ: آفاق بٹ
پنجاب انسٹیٹیوٹ آف لینگوئج، آرٹ اینڈ کلچر (پِلاک)، محکمہ اطلاعات و ثقافت پنجاب دے زیر اہتمام معروف دانشور، کالم نگار، مترجم تے شاعر منظور اعجاز دی کتاب ’’متشو بھاشو‘‘ دی تقریب رونمائی ہوئی جیہڑی کہ جاپانی شاعر دی ہائکو نظماں دا پنجابی شاعری وچ ترجمہ اے۔
تقریب دی صدارت نامور صحافی تے کالم نگار سہیل وڑائچ نے کیتی جد کہ ریوجی ایوسا دی جاپانی ایمبیسی دے انچارج کلچر اینڈ پبلک انفارمیشن نے بطور مہمان خصوصی شرکت کیتی۔ اظہار خیال کرن والیاں وچ ڈاکٹر صغرا صدف، راجہ صادق اللہ، ڈاکٹر نوید عالم، ڈاکٹر غزالہ عرفان، نین سکھ، تے ثمینہ اسماء شامل سن۔
ڈائریکٹر جنرل پلاک ڈاکٹر صغرا صدف نے تقریب دے شرکا دا شکریہ ادا کیتا تے کہیا کہ ڈاکٹر منظور اعجاز نے پنجابی صوفی شعراء اُتے جیہڑا تحقیقی کم کیتا اے اوہ بوہت قابل تحسین اے۔ ہن اوہناں نے جاپانی شاعری دا پنجابی وچ ترجمہ کر کے گراں قدر کم سرانجام دتا اے۔ غیر ملکی ادب دے تراجم توں ادیباں دے اندر وسعت نظری پیدا ہوندی اے۔ تقریب وچ دانشوراں، ادیباں تے شاعراں دی کثیر تعداد نے شرکت کیتی۔
