پِلاک ولوں عظیم ریشماں دی 7 ویں برسی اُتے ’’ لمی جدائی‘‘ محفلِ موسیقی
تقریب وچ عظیم لوک گلوکارہ دے پُتر ساون سنی تے نُونہہ مہرو ریشماں نے پرفارم کیتا
رپورٹ: حافظ ممتاز ملک
پنجاب انسٹیٹیوٹ آف لینگوئج، آرٹ اینڈ کلچر (پِلاک)، محکمہ اطلاعات و ثقافت پنجاب دے زیر اہتمام عظیم لوک گلوکارہ ریشماں دی 7 ویں برسی دے موقعے اُتے خراج تحسین پیش کرن لئی اک محفل موسیقی ’’لمی جدائی‘‘ دے ناں توں منعقد ہوئی جس وچ ایہناں دے پتر ساون سنی خان تے بہو مہرہ ریشماں نے پرفارم کیتا۔ ریشماں جی نوں لوک موسیقی دی بنا اُتے بھرپور پذیرائی حاصل ہوئی ایہناں نوں ستارہ امتیاز تے پرائیڈ آف پرفارمنس نال وی نوازیا گیا۔
تقریب دے آغاز وچ ابتدائی کلمات ادا کردے ہوئے ڈائریکٹر جنرل پلاک ڈاکٹر صغرا صدف نے کہیا کہ مینوں ریشماں جی نال بالمشافہ ملاقات اُتے ایہہ خوشگوار احساس ہویا کہ اک عالمی شہرت یافتہ گلوکارہ کس قدر اپنی دھرتی دی روایات نال جڑی ہوئی اے تکبر تے تصنع توں پاک، سادگی نوں اپنا شعار بنائے ہوئے نیں۔
ریاض خان نے دسیا کہ میڈم نور جہاں وی نہ صرف ایہناں دے مداحواں وچ شامل سن بلکے اپنے گھر بلا کے گھنٹے ایہناں نوں سنیا کردیاں۔ ریشماں دے پتر ساون نے دسیا کہ ایہناں دی اواز وچ سوزوگداز تے ترنم خداتعالیٰ دا ودیعت کردہ سی ایس دے باوجود اوہناں نے رسمی طور اُتے شاگردی وی اختیار کیتی۔ خاور سلیم آذر نے دسیا انڈیا دے دورے اُتے اندرا گاندھی نال ملاقات ویلے اوہناں نے بیکانیر وچ اپنے آبائی علاقے وچ پانی، بجلی تے سڑک بنوان دا مطالبہ کیتا جس اُتے فوری عمل درآمد کیتا گیا جنہوں اوتھے دی عوام نے بے حد سراہیا۔
ساون سنی خان تے مہرہ ریشماں نے دمادم مست قلندر…، کتے نین نہ جوڑیں…، ہائے او ربا نہیوں لگدا دل میرا…، چار دناں دا پیار او ربّا…، من میتھوں نہیوں مندا… تے دیگر گانے پیش کر کے خوب داد وصول کیتی۔ فنکاراں نوں پھُلاں دے تحفے پیش کرن دے علاوہ ریشماں جی دے نال طبلے اُتے پرفارم کرن والے حاجی مشتاق نوں وی پھُل پیش کیتے گئے۔ ریشماں جی دے گانے سکرین اُتے وی وکھائے گئے جس اُتے حاضرین نے خوب تاڑیاں وجائیاں۔ نویں فنکاراں وچ ذیشان، سدرہ، رانا اعجاز تے عاصمہ نے ریشماں دے گانے گا کے ایہناں نوں خراج تحسین پیش کیتا۔ میڈیا نمائندیاں تے مداحواں نے بھرپور شرکت کیتی۔ نظامت دے فرائض ڈائریکٹر محمد عاصم چودھری تے ریاض خان نے سرانجام دتے۔
