حکیم عبدالحمید نظامی ہوراں دی کتاب نبی سوہنے دے 99 ناں دی مُکھ وکھالی
لكهت:سید علی قیصر
پنجابی زبان دے بوہت وڈھے وڈھے شاعر گزرے نیں جیہد ے وچ بابا فرید الدین گنج شکرؒ ،پیر وارث شاہؒ ، بابا بلھے شاہ قصوریؒ، شاہ حسینؒ ، خواجہ غلام فریدؒ تے ہور بڑے نامور تے سر کڈوھویں شاعر ہوئے نیں جہناں اپنی شاعری نال آن والیاں نوں پیار دا درس دتا۔پنجابی شاعری نوں ویکھیا جائے تے ایک وعظ و نصیحتاں نال بھری نظماں غزلاں تے ماہیئے نیں۔ پنجابی زبان وچ بندہ اوہ گلاں کر جاندا اے جہیڑیاں کسے ہور زبان وچ نہیں ھوسکدیاںہر قوم دے شاعراں نے اپنی اپنی زباناں وچ نعت نظم تے غزلاں کہیاں نیں پر جو چس پنجابی زبان دا اے اوہ کسے ہور زبان وچ نہیں۔
ایسے طرحاں پنجاب دی دھرتی نے کئی شاعراں نوں جنم دتا تے اوہناں اپنا ایک مقام بنایااوہناں وچوں ایک صوفی شاعر حکیم عبدالحمید نظامی وی نے جہناں اپنی شاعری نال پنجاب دھرتی دا نام اُچا کیتا۔1965 وچ اپنی شاعری جنگی ترانیاں توں شروع کرن والے ماں بولی دا مان تران حمید نظامی اپنے ضلع قصور دے نال نال پورے پنجاب تے پاکستان دے شاعراں وچ اک وکھرا تے اُچا مقام بنا چکے نیں۔اپنے استاد حافظ محمد حسین حافظ تے الحاج صوفی اصغر علی اصغر دیا دعاواں نال بڑی سوہنی شاعری کردیاں کردیاں درجن توں ودھ کتاباں دے لکھاری بن گئے۔ ہُن تیک حکیم عبدالحمید نظامی دیاں 12 کتاباں مارکیٹ وچ آگیئاں۔ ایناں دی ستویں کتاب،نعلین مبارک تیرے، نوں 2014 وچ پنجاب حکومت نے پہلاں انعام اوس ویلے دے وزیر اعلی پنجاب میاں شہباز شریف دے ہتھوں ایوارڈ تے کیش پرائز دے نال دِتا۔
ھن ایناں دی نویں کتاب “نبی سوہنے دے 99 ناں” نوںکجھ دیہاڑ پہلاں 12 ربیع الاول نوں قوی سیرت کانفرنس اسلام آباد 2020وچ موجودہ وزیر اعظم پاکستان دی موجودگی وچ وفاقی وزیر برائے مذہبی امور پیرزادہ نورالحق قادری ھوراں پنجابی شاعری کیٹیگری وچ پورے پاکستان و چوں اول انعام تے کیش پرائز نال نوازیاں۔اوہناں دی سوہنی تے سُچجی شاعری دی ایس کتاب دا مکھ وکھالی اکٹھ حکومت پنجاب دے ادارے پِلاک ولوں کیتا گیاجہندے وچ پنجابی زبان دے رکھوالے پنجاب دی شان مان تے تران مدثر اقبال بٹ، ڈائریکٹر پلاک صغری صدف، مسعود ارحم خاں، رانا تنویر ریاض خاں، صادق فدا، فقیر کامل، ڈاکٹر ابرار، ارشد اقبال ارشد، رائے عقیل عباس بھٹی، تے سلطان منیر رضوی نے گل بات کیتی ۔تقریب دا آغاز حافظ فیضان نے تلاوت کلام پاک نال کیتا نظامت دے فرائض معروف کمپیئر ایف ایم 95 دے اینکر حافظ ملک ممتاز حسین تے اوہناں دے نال معاونت ڈاکٹر حسن نظامی نے کیتی ۔نعت خواناں وچ اللہ دتہ قادری، زین چشتی، صابر ورک، علیزہ صابر، سہیل سلطان عطاری تے سلمان قلندری شامل سن ۔حکیم عبدالحمید نظامی دی کتاب اُتے شاعری وچ نظم کہن والیا وچ عدل منھاس لاھوری، منشا فوجی، مرتضی راول، فراست بخاری تے ملک اکرم عباس شامل سن۔ خطاب کرن والیاں حمید نظامی ہوراں نوں کتاب دی مُکھ وکھالی اور حکومت پاکستان ولوں اول انعام ملن اُتے ڈھیر مبارکاں دِتیاں تے اوہناں دی سلامتی لئی دعاواں وی کیتیان۔ اخیر تے حکیم عبدالحمید نظامی ہوراں ایس تقریب دا پربندھ کر اُتے ڈی جی پِلاک صغری صدف ہوراں سمیت رلت کرن والے سبھے پروہنیاں دا شکریہ ادا کیتا ۔ تقریب توں بعد پروہنیاں لئی اَن پانی دا بندوبست وی کیتا گیا سی۔
