یومِ اقبال تے سائبان ویلفیئر سوسائٹی دے پنجویں یومِ تاسیس دی تقریب

حضرت علامہ اقبال صوفیا کرام نال بے پناہ محبت کردے سن، عتیق انور راجہ

رپورٹ: علی عمران چٹھہ

حضرت علامہ اقبالؒ دا کلام سانوں ساڈے تابناک ماضی دی یاد دلواندا اے تے ساڈی اج دی حالت نوں دین توں دوری بیان کردے ہوئے سانوں فیر توں اک ملت وچ پرون دی کوشش کردا اے۔ اقبالؒ امید تے خود شناسی دی گل کردے نیں۔ کلام اقبال ایسے نوں سمجھ آندا اے جس دے دل وچ سچی لگن ہوئے۔

حضرت علامہ ڈاکٹر محمد اقبالؒ دے یوم ولادت تے سائبان ویلفیئر سوسائٹی دے پنجویں یوم تاسیس اُتے میرین ہوٹل گوجرانوالہ وچ ’ملت کا سائبان ہے فکر اقبالؒ ،دے عنوان توں اک سیمینار دا انعقاد کیتا گیا جس وچ شہر دے تعلیمی اداریاں دے سربراہان ،موٹیویشنل سپیکرز ،صدر گوجرانوالہ چیمبر آف کامرس اینڈ انڈسٹری تے معززین شہر نے بھر پور شرکت کیتی ۔

مقررین وچ الحاج سعید احمد تاج(سابق صدر چیمبر)عمر اشرف مغل(صدر چیمبر) سجاد سردار وڑائچ،پروفیسر نائلہ بٹ،پروفیسر عرفان اشرف،شوکت ڈار،چوہدری محمد طاہر،چوہدری محمد شاہد،عرفانہ امر،یاسر عرفات،سہیل بشیر،محمد عمران منور،مقصود احمد مٹو،حافظ محمد عرفانڈعاطف ربانی،ذوالفقار ججا،شیخ انعام چاندی والا،چوہدری محمد سلیم،میاں احتشام،عثمان اشرف،یسین گجر،راجہ افضال عزیز،چوہدری اشرف منہاس،یعقوب انجم مغل،یاسر مشتاق مغل،خرم شہزاد بھٹہ و دیگر شامل سن۔مقررین نے کہیا کہ علامہ اقبال نال محبت دی نشانی ایہہ وے کہ ایہناں دے کلام و پیام نوں اپنی زندگیاں دا حصہ بنایا جائے تے ایہہ وی سمجھن دی کوشش کیتی جائے کہ حضرت علامہ اقبالؒ نوں حکیم الامت کیوں کہیا جاندا اے۔ علامہ اقبالؒ دے عشق ِ رسولﷺ اُتے گل کردے ہوئے سعید احمد تاج نے کہیا کہ علامہ اقبال دی حیاتی دا وڈا حصہ نبی پاک ﷺ اُتے درود سلام پڑھدے لنگھیا سی۔ عشق رسولؐ نے ای ایہناں دے اندر ایمان دی اوہ چنگاری روشن کیتی جس نے اقبالؒ دے دل و دماغ نوں انج دی روشنی دتی کہ اقبالؒ دا ہر شعر کمال درجہ حاصل کردا چلا گیا۔سائبان دے یوم تاسیس دے حوالے نال گل کردے ہوئے مقررین دا کہنا سی کہ ٹیم سائبان حقیقی معنیاں وچ اپنی زبان، روایات تے ثقافت دے فروغ لئی کم کر رہی اے۔ عتیق انور راجہ نے کہیا کہ حضرت علامہ اقبالؒ صوفیا کرام نال بے پناہ محبت کردے سن۔ علامہ اقبال نے اپنے اشعار وچ ملت دے نوجواناں نوں ایہناں دا کھویا ہویا مقام پان دا سبق دتا اے ہن ایہہ ساڈی ذمے داری اے کہ اسیں ایہناں دے کلام نوں اپنے بچیاں نوں سکھان سمجھان تے ایس اُتے عمل کروان دی کوشش کریے۔ دنیا وچ اج اوہ ای ملک ترقی یافتہ اکھوا رہے نیں جنہاں نے اپنے نوجواناں دی بہتر تربیت کیتی۔ تربیت دا بہترین طریقہ ایہہ اے کہ نوجواناں نوں مسلسل انج دیاں سرگرمیاں دا حصہ بنان دی کوشش کیتی جائے جنہاں وچ اوہ اپنے جذبات دا اظہار کر سکدے نیں۔ کھل کے مسکرا سکدے نیں۔ گنگنا سکدے ہون تے قہقہے وی لا سکدے نیں۔ بدقسمتی نال پاکستان وچ مجموعی طور اُتے انج دا کدی وی نہیں ہویا ایسے لئی ساڈا اج دا نوجوان ذہنی گھٹن دا شکار اے۔

ایہہ گھٹن ساری حیاتی ایس دے نال چلدی اے۔ اسیں پچھلے پنج ورھیاں توں لوکاں دے رویاں وچ بہتری لئی ادبی و ثقافتی تقریباں تے سیمیناراں دا اہتمام کرن دی کوشش کر رہے آں تے ساڈی کامیابی ایہہ وے کہ ساڈے ایس کاروان وچ ہر طبقے فکر دے لوک شامل ہو رہے نیں۔ سعید احمد تاج سابق صدر چیمبر نے کہیا کہ شاعری مشاہدے تے احساسات دا ناں اے جس قلم کار دا مشاہدہ چنگا ہوئے گا جس دے اندر دا انسان جنہا باشعور ہوئے گا جیہڑا جنہا اخلاقی قدراں دا پاسدار ہوئے گا ایس دے قلم دی کٹ اینی طاقتور ہوئے گی۔ اوہ شروع دن توں عتیق انور راجہ تے ایہناں دی ٹیم دی کوششاں دے معترف رہے نیں۔ ایہہ لوک حقیقی معنیاں وچ اپنی زبان ، روایات تے ثقافت دے فروغ لئی کم کر رہے نیں۔ ایہہ لوک ویلے دی پابندی دی کوشش کردے نیں۔ ایس لئی میں اپنے مصروفیات وچوں ویلا کڈ کے ایہناں دے مشاعریاں تے سیمیناراں وچ شرکت کرن دی کوشش کرنا واں۔ صدر چیمبر عمر اشرف مغل نے کہیا کہ ایس تقریب دا حصہ بن کے بوہت خوشی محسوس کر رہیا واں ، اسیں کوشش کرنی اے کہ پہلے آپ تے فیر اپنے لوکاں نوں مایوسی تے ذہنی غلامی توں کڈن لئی کم کریے۔ اج اسیں ایہہ وی عہد کرنا اے کہ اوہ لوک جنہاں دا معاشرے وچ بُرا امیج ہوئے ایہناں نال ملن جلن توں پرہیز کریے تے چنگے لوکاں نوں خراج عقیدت پیش کرن لئی سائبان بنیے۔ تے مینوں ایہہ احساس ہو رہیا اے کہ اسیں چیمبر دے پلیٹ فارم توں اپنا بھرپور کردار ادا کرنا اے۔ اسیں نوجواناں نوں ادبی و ثقافتی ماحول نال وابستہ کر کے معاشرے نوں پرامن بنان وچ اپنا کردار ادا کریئے۔ سائبان دے پلیٹ فارم توں اسیں مسلسل ایہہ کوشش کیتی اے کہ اپنی دھرتی نال محبت دا درس دتا جائے۔ لوکاں نوں اپنی زبان دی اہمیت توں آگاہ کیتا جائے تے پنجاب دی اعلیٰ روایا ت، اقدار تے اخلاقات نوں عام کیتا جائے۔ سائبان نوں ملن والی پذیرائی دی وجہ ایہہ وے کہ حضرت اقبالؒ دے کلام توں درس لیندے ہوئے لوکاں نوں خود شناسی دا سبق دے رہے آں۔ اپنی زبان، اپنی دھرتی پنجاب تے اپنی ثقافت اُتے فخر کرنا سکھا رہے آں۔